بدترین لوڈ شیڈنگ، سکردو میں سڑکوں پر افطاری

سکردو:سکردو میں بجلی کی طویل ترین بریک ڈاﺅن کیخلاف جگہ جگہ احتجاجی مظاہرے کیے گئے اور شہریوں نے لوڈشیڈنگ کیخلاف دھرنے دیے ۔حسین آباد میں دھرنے کے شرکاءنے سڑک پر روزہ افطار کیااور بجلی کی طویل ترین لوڈشیڈنگ پر واپڈا کیخلاف شدید نعرے بازی کی اور سیاچن روڈ کو کئی گھنٹے تک بند کردیا گیاجگہ جگہ پر پہلی رمضان کو شہری بجلی کی لوڈشیڈنگ کیخلاف سڑکوں پر نکل آئے شہریوں نے کہا کہ سکردو شہر میں وزیر اعظم میاں نواز شریف کے اعلانات کی دھجیاں اڑائی گئیں اور پہلی رمضان کو سکردو شہر سمیت متعدد مضافاتی علاقو ں کو اندھیرے میں دھکیل دیاگیا۔ شہریوں نے کہا کہ وزیر اعظم نے اعلان کیا تھا کہ ملک بھر میں افطار اور سحر کے اوقات میں بجلی کی کوئی لوڈشیڈنگ نہیں ہوگی تاہم واپڈا حکام نے وزیر اعظم میاں نواز شریف کے اعلان کی دھجیاں اڑا دیں سکردو شہر سمیت مضافاتی علاقوں میں شہریوں نے افطار سڑکوں پر کیا ۔انہوں نے کہا کہ بجلی کی غیر اعلانیہ اور طویل ترین لوڈشیڈنگ کے باعث گھریلو اور کاروباری معاملات ٹھپ ہوکر رہ گئے ہیں اور واپڈا حکام ٹس سے مس نہیں ہورہے ہیں۔انہوں نے کہا کہ رمضان المبارک کے مہینے میں بجلی بند کرکے واپڈا حکام سکردو میں امن امان کا مسئلہ پیدا کرنا چاہتے ہیں۔وزیر اعظم نواز شریف ،وفاقی وزیر پانی و بجلی خواجہ آصف ،نگران وزیر اعلیٰ شیر جہاں میر،گورنر برجیس طاہر ،چیف سیکرٹری اور سیکرٹری برقیات سکردو میں بجلی کی طویل لوڈشیڈنگ کا نوٹس لیںورنہ حالات خراب ہونگے۔انہوں نے کہا کہ ہم پرامن لوگ ہیں سابق حکومت نے بجلی کے بڑے بڑے منصوبوں کو ناکام بنادیا پانچ سال میں اس نے ایک بھی بجلی گھر تعمیر نہیں کیا جس کے باعث شہری بدترین مشکلات سے دوچار ہیں۔انہوں نے کہا کہ سکردو کو اندھیرے میں ڈبونے کی ساز ش ہورہی ہے اس سازش کے پیچھے ان لوگوں کا ہاتھ ہے جو ہمیشہ سکردو کی ترقی اور خوشحالی کے خلاف کام کررہے ہیں ہم ایسے لوگوں کو باور کرانا چاہتے ہیں کہ وہ باز آجائیں ورنہ ان کیلئے سکردو کی زمین تنگ کردینگے۔